600 мың теңгенің торт дауына сот нүкте қойды
Желіде дауға ұласқан төрт қабатты торттың ісі шешілді.
SMARTNEWS.KZ басылымының хабарлауынша, 6 қаңтар күні Астананың азаматтық істер жөніндегі ауданаралық соты құрметтілік, абырой және іскерлік беделді қорғау туралы азаматтық істі қарады. Сот барлық талаптарды қанағаттандырмауға шешім қабылдады.
Сот анықтағандай, тараптар арасында іс жүзінде келісімшарттық қатынастар болған: жауапкер мерекелік шараға торт жасап, тапсырыс берушіге жеткізген. Торттың алынғаны мен пайдаланылғаны туралы дау болмаған, алайда соңғы құны алдын ала келісілмеген, бұл қақтығыстың негізгі себебі болды.
Даудың өршуінен кейін жауапкер әлеуметтік желілерде ақпарат жариялаған. Кейін үшінші тұлғалар видеоматериалдар жасап, жауапкер оларды өз парақшаларында бөліскен. Сот тергеу барысында видеоны жасағандардың үшінші тұлғалар екені анықталды, жауапкер олардың жасалуына қатыспаған.
Сот сараптама жүргізуден бас тартқан талапкердің дәлелдеріне сүйене отырып, таралған ақпараттың беделге нұқсан келтіргенін немесе заңдық сипатын анықтау мүмкін болмағанын айтты. Авторлық құқықтардың бұзылғаны немесе жеке деректерді заңсыз қолдану фактілері де дәлелденбеді.
«Осы жағдайларды ескере отырып, сот талаптарды қанағаттандырудан бас тартты», – делінген хабарламада.
Сот шешімі әлі заңды күшіне енген жоқ.
Еске сала кетейік, Threads желісінде кондитер Нұршат Ақбергенова құрақ көрпе жасайтын дизайнер Аселина Батырдың үстінен шағымданып бірнеше пост жариялаған еді. Айтуынша, кондитер төрт қабатты, құрақ көрпеге ұқсас тортқа тапсырыс алған, бірақ Аселина Батыр мерекелік тапсырыстың ақысын төлемей қойған. Ал құрақ көрпе жасаушы әйел өз кезегінде торттың бағасы алдын ала ескертілмегенін айтып, оның шынайы құны 250-300 мың теңге болуы керек деген пікірін білдірді. Ал кондитер «нақты бағасы 800 мың теңге еді, тек жеңілдік жасадым» деді.
Материал авторы
