RUS
SMARTNEWS.KZ басылымының хабарлауынша, Ақтөбе қаласында 54 жастағы ер адамнан ақша бопсалады деген күдікпен жас әйел ұсталды. Бұл туралы облыстық полиция департаменті мәлімдеді.
Полицияның мәліметінше, жедел-іздестіру шаралары барысында жергілікті тұрғынның қылмыстық әрекеті әшкереленген. Тергеу деректеріне сәйкес, күдікті ер адамды өзіне қатысты зорлау жасалды деп жалған арыз жазамын деп қорқытып, 450 мың теңге талап еткен.
«Күдікті әрекетін әдейі жасаған. Ол жәбірленушіні құқық қорғау органдарына арызданамын деп қорқытып, үнсіз қалуы үшін ақша бопсалаған», – деп хабарлады полиция департаменті.
Жедел іс-шаралар нәтижесінде 28 жастағы күдікті әйел ақша алу сәтінде қолға түсті. Ол полиция бөліміне жеткізіліп, алынған қаржы тәркіленді. Күдікті кінәсін толық мойындап, қылмысқа жеке пайдасын көздеп барғанын түсіндірген.
Аталған дерек бойынша бопсалау фактісімен қылмыстық іс қозғалды. Қазір сотқа дейінгі тергеу жүргізіліп жатыр. Заң бойынша күдіктіге мүлкін тәркілеумен немесе онсыз төрт жылға дейін бас бостандығынан айыру жазасы қарастырылған.