RUS
SMARTNEWS.KZ басылымының хабарлауынша, Шымкент қаласында М. Әуезов атындағы Оңтүстік Қазақстан университетінің басшылығына қатысты ірі қаржылық заңбұзушылық ісі сотқа жолданды. Бұл туралы Қаржылық мониторинг агенттігінің қала бойынша департаменті мәлімдеді.
Тергеу дерегіне сәйкес, университетте бюджет қаражатын жымқыру фактісі бойынша қылмыстық іс қозғалып, тергеу толық аяқталған. Күдіктілер қатарында бұрынғы бірінші проректор, қаржы және әкімшілік департаменттердің директорлары, өндірістік-техникалық бөлімнің қойма меңгерушісі, сондай-ақ мердігер ұйымдардың басшылары бар.
ҚМА мәліметінше, күдіктілер тауарлар іс жүзінде жеткізілмеген немесе әдейі қымбат бағамен рәсімделген жалған мемлекеттік сатып алу шарттарын жасаған. Университетпен байланысы бар жеке кәсіпкерлер мен коммерциялық ұйымдардың шоттарына аударылған қаражат кейін қолма-қол ақшаға айналдырылып, қылмыстық топ мүшелері арасында бөлінген.
Тергеу барысында белгілі болғандай, осы схема аясында университет басшылығы нарықтағы құны 200 мың теңгеден аспайтын бір креслоны 20 млн теңгеге сатып алған.
Нақты жеткізілімдердің болмауын жасыру үшін күдіктілер тозған тауарлық-материалдық құндылықтарды балансынан формалды түрде есептен шығарып, оларды іс жүзінде пайдалануды жалғастырған. Ал есептен шығарылған мүліктің орнына алынуы тиіс жаңа тауарлар мүлде жеткізілмеген.
Нәтижесінде мемлекетке 321 млн теңге көлемінде залал келтірілген. Тергеу барысында күдіктілер келтірілген шығынның 264 млн теңгесін ерікті түрде өтеген.
Сот санкциясымен күдіктілердің мүлкіне тыйым салынды. Атап айтқанда, төрт тұрғын үй, бір автокөлік және банктік шоттардағы 40 млн теңге көлеміндегі қаражат бұғатталды.
Қылмыстық іс соттың қарауына жіберілді. ҚР Қылмыстық-процестік кодексінің 201-бабына сәйкес өзге ақпарат жария етілмейді.