«Жалғызбасты анамын»: Желіде биші әйел өзіне той үстінде мас адам күш қолданғанын айтты (ВИДЕО)

SMARTNEWS.KZ басылымының хабарлауынша, әлеуметтік желіде той үстінде болған оқиғаға қатысты видео кеңінен тарады. Жазбаны өзі жәбір көрген биші жариялаған. Оқиға қоғамда үлкен резонанс туғызып, Қазнетте қызу пікірталасқа ұласты.

Бишінің айтуынша, өнер көрсетіп жатқан сәтінде белгісіз ер адам оның қолынан дөрекі түрде ұстап, ресторан залынан күштеп шығарып жіберген. Ол бұл жағдайды кәсіби мансабындағы ең сорақы оқиға деп бағалап отыр.

«Елестетіп көріңіздер, 14 жылдық тәжірибемде мұндайды алғаш рет көріп тұрмын. Қазір сахнаға шығудан қорқамын. Бұл – мас күйдегі бөтен адам. Биімді тоқтатып қана қоймай, өміріме қауіп төндірді. Екі күн өтсе де, арыз жазғым келеді. Мұны жабулы қазан күйінде қалдыруға болмайды. Сол жерде тапсырыс берушілер мен асаба оның кім екенін жасырып қалды. Мен – үш баланы осы өнердің арқасында асырап отырған жалғызбасты анамын. Ол кім өзі маған бұлай істейтіндей?» – деп жазды биші.

Ол сондай-ақ оқиға орнында түсірілген видеоны да жариялады. Кадрлардан бишінің қонақтар алдында биін бастағаны, артынша ер адамның жақындап келіп, қолынан тартып, залдан шығарып жібергені анық көрінеді.

Желі қолданушылары бұл жағдайды қызу талқылап, бишінің қауіпсіздігі мен той үстіндегі жауапкершілік мәселесін көтеріп жатыр.