RUS
SMARTNEWS.KZ басылымының хабарлауынша, Екібастұз қаласында психоневрологиялық диспансерде ұзақ жылдар бойы есепте тұрған ер адам әйелін қызғаныштан соққыға жықты. Әйел ауыр бас жарақатын алып, ауруханаға жеткізілді.
Оқиға 2025 жылдың қыркүйек айында болған. Тергеу дерегінше, жанжал әйелдің жұмыстан оралуынан кейін басталған. Күйеуі мас күйде болып, қызғанышқа байланысты дау шығарған.
Тұрмыстық жанжал кезінде ер адам шәйнекті алып, әйелінің басынан екі рет ұрған. Салдарынан жәбірленуші есінен танып, жабық бас-ми жарақатымен медициналық мекемеге жеткізілген.
Сотта анықталғандай, ер адам шизофрения дертіне шалдыққан және 1991 жылдан бері психоневрологиялық диспансерде есепте тұр.
Аталған факті бойынша «Денсаулыққа қасақана орташа ауырлықтағы зиян келтіру» бабы бойынша қылмыстық іс қозғалған. Алайда сот талқылауы ұзаққа созылмаған.
Екібастұз қалалық соты ер адамды қылмыстық жауапкершіліктен босатып, оған мәжбүрлі медициналық шара қолдану туралы шешім шығарды.
«Жалпы типтегі психиатриялық стационарда мәжбүрлі ем тағайындалсын», – делінген сот қаулысында.
Белгілі болғандай, ерлі-зайыптылар 35 жылдан астам уақыт некеде тұрған. Сотта жәбірленуші күйеуін өмір бойы емдеуге жіберуді сұраған.
Бұл талапты олардың қызы да қолдаған. Ол – ер адамның заңды қамқоршысы. Қызының айтуынша, әкесі анасына бұрын да бірнеше рет күш көрсеткен.