RUS
SMARTNEWS.KZ басылымының хабарлауынша, Шымкент қаласындағы №59 «Айша» мемлекеттік балабақшасында тәрбиешіге қатысты қылмыстық іс қозғалды. Ол балаларды ине тағылған шприцке ұқсас затпен қорқытқан.
Оқиға бейнеленген видео әлеуметтік желілерде тарап, қоғамда кең резонанс тудырды. Ата-аналар балаларының қауіпсіздігіне алаңдап, жауапты органдардан нақты шара қолдануды талап етті.
Бейнебақылау камераларындағы кадрларда тәрбиешінің қолында ине бар шприцке ұқсайтын зат ұстап, бүлдіршіндерді үркіткені анық көрінеді.
Қалалық білім басқармасының мәліметінше, оқиға Тұран ауданында орналасқан №59 «Айша» ясли-балабақшасының «Бәйтерек» мектепалды тобында болған. Тексеру нәтижесінде тәрбиешінің кәсіби әдеп нормаларын өрескел бұзғаны анықталған.
Оқиғадан кейін жедел түрде ведомствоаралық кеңес өткізіліп, оған прокуратура, полиция, білім және денсаулық сақтау саласының өкілдері, балабақша әкімшілігі мен ата-аналар қатысқан. Жиында балалардың қауіпсіздігін қамтамасыз етуге бағытталған нақты шаралар талқыланған.
Қалалық полиция департаменті ата-аналардың арызы негізінде тәрбиешіге қатысты қылмыстық іс тіркелгенін хабарлады. Қазіргі уақытта оқиғаның барлық мән-жайы жан-жақты тексеріліп, кешенді тергеу жүргізіліп жатыр.
Сонымен қатар құқық қорғау органдары білім басқармасына балабақша басшылығын уақытша қызметінен шеттету және тәрбиешіні жұмыстан босату жөнінде ұсыныс енгізді. Тергеу қорытындысы бойынша оқиғаға құқықтық баға берілмек.