«Отбасы банк» зейнетақы ақшасымен ипотека өтеуді уақытша тоқтатты

SMARTNEWS.KZ басылымының хабарлауынша, «Отбасы банк» ипотекалық қарызды өтеу үшін зейнетақы жинақтарын пайдалану бойынша өтінім қабылдауды уақытша тоқтататынын хабарлады. Шектеу 2026 жылғы 2 наурызға дейін күшінде болады.

Банктің мәліметінше, бұған міндетті зейнетақы жарналарын пайдалану ережелеріндегі өзгерістер себеп болған. Атап айтқанда, енді қазақстандықтар зейнетақы артық қаражаты есебінен ипотеканың ай сайынғы төлемін пайызымен қоса жаба алмайды.

Жаңа талаптарға байланысты қарызды ішінара немесе толық өтеу рәсімін қайта бейімдеу қажет. Осыған орай банк өз цифрлық сервистерін жаңарту үшін өтінім қабылдауды уақытша тоқтатуға мәжбүр болған.

«enpf-otbasy.kz платформасында өтінім қабылдау 2026 жылғы 30-ынан 31 қаңтарға қараған түні тоқтатылып, 2 наурызға дейін жалғасады. 30 қаңтарды қоса алғанға дейін берілген өтінімдер бұрынғы ережелер бойынша өңделеді», — деп хабарлады «Отбасы банк».

Осылайша, 30 қаңтарға дейін үлгерген азаматтар зейнетақы жинағын ескі тәртіппен пайдалана алады. Ал қалғандары өтінім қабылдау қайта басталғанын күтуге мәжбүр.

Бұған дейін азаматтар зейнетақы жинақтарының артығын ипотеканың негізгі қарызы мен пайызын қоса толық өтеуге пайдалана алатын. Енді жаңа ережеге сәйкес, зейнетақы жинағын тек негізгі қарызды жабуға бағытталады.

Мысалы:

ипотекалық несие пайызы — 6 175 теңге;

негізгі қарыз — 65 699 теңге;

ай сайынғы төлемнің жалпы сомасы — 74 825 теңге.

Егер шотта 100 мың теңге артық қаражат болса, жаңа тәртіп бойынша оның тек 65 699 теңгесі ғана негізгі қарызды өтеуге жұмсалады. Қалған сома қарыз мерзімін қысқартуға немесе ай сайынғы төлемді азайтуға әсер етеді, ал пайызды қарыз алушы өз қаражатымен төлеуі тиіс.

Сонымен қатар, қарыз алушылар негізгі қарызды мерзімінен бұрын өтеу құқығын сақтап қалады, ал ай сайынғы төлемді бекітілген кесте бойынша өз қаржысымен жабады.

Айта кетейік, бұған дейін емделуге арналған біржолғы зейнетақы төлемдерін пайдалану бойынша өтінімдер де уақытша тоқтатылған болатын.