RUS
SMARTNEWS.KZ басылымының хабарлауынша, Еуропалық футбол қауымдастықтары одағы (УЕФА) 2025/2026 жылғы маусымдағы Чемпиондар лигасының негізгі кезеңіне қатысқан клубтарға төленген қаржы көлемін жариялады. Ресми мәліметке сәйкес, алматылық «Қайрат» қазірдің өзінде 20,1 миллион еуро көлемінде табыс тапқан.
УЕФА таратқан ақпаратқа сәйкес, алғашқы төлем 2025 жылғы 19 қыркүйекте жүзеге асқан. Сол күні турнирдің жалпы бюджеті аясында әр клубқа, оның ішінде «Қайратқа» да 17,8 миллион еуро (шамамен 10,7 миллиард теңге) көлемінде базалық төлем аударылған.
Сонымен қатар алматылық клуб телетрансляция құқықтары мен маркетингтік кірістер үлесінен 1,62 миллион еуро (972,5 миллион теңге) алған. Бұл – Чемпиондар лигасының негізгі кезеңіне қатысушы клубтар үшін осы санаттағы ең төменгі төлем мөлшері.
Екінші транш 21 қарашада жасалған. Алғашқы төрт турдың нәтижелері үшін берілетін бонустар аясында «Қайрат» өз алаңында «Пафос» клубымен тең ойнағаны үшін 700 мың еуро (шамамен 420 миллион теңге) алды.
Осылайша, қазіргі сәтке дейін «Қайратқа» төленген қаражаттың жалпы көлемі 20,1 миллион еуроны немесе 12,1 миллиард теңгені құрап отыр.
Маусым соңында клуб турнирлік кестедегі орны үшін (36-орын), сондай-ақ тең нәтижелер бойынша бөлінбей қалған қаражат үлесінен қосымша сыйақы алады. Бұл «Қайраттың» Чемпиондар лигасынан түсетін жалпы табысын 21,2 миллион еуроға, яғни 12,7 миллиард теңгеге дейін жеткізбек.
Айта кетейік, кеше алматылық команда Чемпиондар лигасының негізгі кезеңіндегі өнерін ресми түрде аяқтады. «Қайрат» сегіз турдың қорытындысында небәрі бір ұпай жинап, турнирлік кестенің соңғы сатысында қалды.