«Жалғызбасты анамын»: Депутаттың кездесуге баласымен барғаны қызу талқыланып жатыр (ВИДЕО)
Әлеуметтік желіде депутаттың бұл ісіне қолдау да, сын да қатар айтылды.
SMARTNEWS.KZ басылымының хабарлауынша, Түркістан облыстық мәслихатының депутаты Нұрайым Шақимерген сайлаушылармен өтетін кездесулерге кей жағдайда баласымен бірге қатысуға мәжбүр екенін мәлімдеді. Бұл туралы ол өзінің Facebook парақшасында жазды.
Депутаттың айтуынша, бала күтушінің ауырып қалуына байланысты ол жұмыс сапарларын кейінге шегере алмаған.
«Бұрын жалғызбасты аналарды аяушы едім. Қазір өзім сол қатарға қосылдым. Бірақ сезімім мүлде басқа. Түсінгенім – жалғызбасты аналар әлсіз емес. Олар ешкімге айтпайтын, ешкімге көрсетпейтін нағыз күштің иесі. Себебі қандай жағдайда да тоқтап қалмайтынын өз басымнан өткеріп жүрмін.
Сол күні бала күтуші ауырып қалды. Балам өзге ешкімге көнбейді. Ал халықпен кездесу кейінге шегерілмеуі керек, себебі бұл – үлкен жауапкершілік. Сондықтан кей сәттерде баламмен бірге елге қызмет етемін», – деп жазды мәслихат депутаты.
Жазба әлеуметтік желіде қызу талқыланып, пікірлер екіге жарылды. Бірі депутатқа қолдау білдірсе, енді бірі бұл қадамды сынға алды.
Пікір қалдырған қолданушылардың бір бөлігі:
«Жалғыздың жары – Құдай! Бастысы, ниетіңіз таза болсын. Адал еңбекті серік етсеңіз, әлі-ақ белестерді бағындырасыз», – деп қолдау білдірсе, тағы бір қолданушы:
«Халыққа жанашыр болып келді деу қиын. Көзге түсу үшін жасалған әрекет сияқты көрінеді», – деп жазған.
Сондай-ақ желі қолданушыларының бір бөлігі депутаттың жалғызбасты аналар туралы пікірін де сынға алып, тұрмыстық жағдайы төмен әйелдердің күнкөрісін ескеруге шақырды.
«Жылы кабинетте отырған адамға айту оңай. Көп жалғызбасты әйел таңның атысынан автобус күтіп, әрең күн көріп жүр», – делінген пікірлердің бірінде.
Депутаттың жазбасына қатысты ресми түсініктеме берілген жоқ.
Материал авторы
