RUS
SMARTNEWS.KZ басылымының хабарлауынша, Ресейдің Тергеу комитеті Германия аумағында қаза тапқан Қазақстанның бұрынғы судьясы Айгүл Сайлыбаева ісі бойынша тексеру бастады. Бұл іс тікелей Ресей Тергеу комитетінің төрағасы Александр Бастрыкиннің бақылауына алынды.
Марқұмның отбасы Ресей Федерациясы Тергеу комитетінің басшысына ресми өтініш жолдаған. Өтінішке себеп — Ресейдің федералдық телеарналарының бірінде көрсетілген журналистік материал. Сюжетте Германияда жүрген Қазақстан азаматының өліміне оның бұрынғы күйеуі мен енесі қатысы болуы мүмкін екені айтылған. Ақпаратқа сәйкес, Германияда қылмыстық іс қозғалғаннан кейін олар Мәскеуге кетіп қалған болуы ықтимал.
Марқұмның ата-анасы негізгі сұрақтарға жауап ала алмаған соң, істің әділ әрі жан-жақты тергелуіне үміт артып, Ресей Тергеу комитетінің төрағасына тікелей жүгінген.
Ресей Тергеу комитетінің ресми хабарламасында былай делінген:
«Сюжетте келтірілген уәждер бойынша Мәскеу қаласы бойынша Ресей Тергеу комитетінің тергеу органдары процессуалдық тексеру ұйымдастырды. РФ Тергеу комитетінің төрағасы А.И.Бастрыкин Мәскеу қаласы бойынша Бас тергеу басқармасының басшысы Д.В.Беляевқа тексерістің барысы жөнінде баяндауды тапсырды. Тапсырманың орындалуы ведомствоның орталық аппаратында бақылауға алынды».
Айгүл Сайлыбаева 2020 жылы күйеуімен бірге Қазақстаннан шетелге көшіп кеткен. 2024 жылғы 4 маусымда оның үйден шығып, белгісіз бағытқа кеткені хабарланған. Соңғы рет ол 3 маусым күні Берлин уақытымен сағат 10:35-те байланысқа шыққан.
Марқұмның туған бауыры әпкесінің бұрынғы күйеуі мен енесі тарапынан қысым көріп жүрген болуы мүмкін екенін бұған дейін мәлімдеген.
2024 жылғы 16 маусымда 40 жастағы Айгүл Сайлыбаеваның мәйіті Германиядағы Бенсхайм қаласының шетіндегі Эрлахе карьері аумағынан табылды. Ал 29 маусымда марқұм Алматы қаласында жер қойнына тапсырылды.
Айгүл Сайлыбаеваның мүддесін қорғаған адвокат Жанна Оразбақова әлеуметтік желіде Германия полициясының әрекетсіздігін ашық сынға алды. Оның айтуынша, жеткілікті айғақтар мен куәгерлердің көрсетулері болғанына қарамастан, бұл іске байланысты әзірге ешкім қамауға алынбаған, ал басты күдіктілер бостандықта жүр.
Бұған қоса, марқұм судьяның анасы Қазақстан Президенті Қасым-Жомарт Тоқаевқа ресми өтініш жолдаған.