RUS
SMARTNEWS.KZ басылымының хабарлауынша, Қырғызстанда биологиялық жынысты заңмен «өзгермейтін» ұғым ретінде бекіту көзделіп отыр. Елде осыған қатысты заң жобасы қоғамдық талқылауға шығарылды. Бұл туралы 24.kg жазды.
Заң жобасына сәйкес, адамның жынысы тек туған кезде тіркелген биологиялық белгілер арқылы ғана айқындалады және ол азаматтың өтінішімен де, медициналық қорытындымен де, сот шешімімен де өзгертілмейді. Ерекше жағдай ретінде тек бастапқы тіркеу кезінде кеткен техникалық қателіктерді түзетуге ғана рұқсат беріледі.
Құжатта адамның жынысы отбасылық-құқықтық қатынастарды реттеуде жалғыз заңды санат ретінде белгіленбек. Атап айтқанда, неке қию, ана мен әкені анықтау, сондай-ақ өзге де отбасылық мәселелерде тек биологиялық жыныс ұғымы қолданылатын болады.
Сонымен бірге Ата-ана баланы оның биологиялық жынысына сәйкес тәрбиелеуге міндетті деп нақты жазылады. Заң жобасында туу туралы актідегі жынысқа қатысты жазба түпкілікті болып саналатыны және кейін оны өзгертуге тыйым салынатыны айқын көрсетілген.
Бұған қоса, заң жобасы жынысты өзгертуге бағытталған кез келген медициналық араласуға – хирургиялық операциялар мен гормоналды терапияға тыйым салуды көздейді. Мұндай араласуға тек жыныс дамуының сирек кездесетін туа біткен ақауларын емдеу мақсатында, дәрігерлік комиссияның қорытындысы мен сот шешімі болған жағдайда ғана жол беріледі.
Билік өкілдері бұл бастама құқықтық айқындықты күшейтіп, отбасылық қатынастарды реттеуде бірыңғай тәсіл қалыптастыруды мақсат ететінін алға тартып отыр. Қоғамдық талқылау барысында құжатқа қатысты түрлі пікірлер мен ұсыныстар айтылуда.