RUS
SMARTNEWS.KZ басылымының хабарлауынша, Атырауда колледж оқытушысының сабаққа кешіккен студенттерді дене жаттығуымен «жазалауы» тергеуге ұласты.
Оқиға 30 қаңтарда Атыраудағы Энергетика және құрылыс колледжінде болған. Ағылшын тілі пәнінен сабақ берген Арайлым Ізбасарова кешіккен студенттерге серпіліс жасатқаны үшін тексеріске іліккен.
Студенттің анасы Ольга Шахованың айтуынша, оның 16 жастағы ұлы Роман Худин сабаққа небәрі алты минутқа кешіккен. Осыдан кейін оқытушы жасөспірімге жаза ретінде жүз рет серпіліс жасауды тапсырған.
«Әрине, ол жүз рет орындай алмады. Тек жетпіс рет қана жасады», – дейді анасы.
Сабақтан кейін үйіне оралған Романның жағдайы күрт нашарлаған. Отбасы 103 нөміріне жедел жәрдем шақырған. Медицина қызметкерлері жасөспірімнің қан қысымын 150/80 деп тіркеген. Тексеруден соң ол ауруханаға жатқызылып, 72 сағаттық артериялық қысымды бақылау құрылғысы және жүрек жұмысына мониторинг жасайтын аппарат тағылған.
Анасының сөзінше, осы оқиғадан кейін ол полицияға арыз жазып, денсаулыққа зиян келтіру дерегі бойынша қылмыстық іс қозғауды және оқытушыны жауапкершілікке тартуды сұраған.
Шағым Атырау облыстық білім басқармасының басшысы Марат Әбуовтың атына да жолданған.
Ал Роман Худиннің өзі бұл тәсіл тек оған ғана қолданылмағанын айтады. Оның сөзінше, сабаққа кешіккен басқа студенттер де дәл осылай серпіліс жасауға мәжбүр болған. Мұндай «тәрбиелеу әдісі» бірнеше рет қайталанған және тек ағылшын тілі пәнінде қолданылған.
Оқиға әлеуметтік желілерде қызу талқыланып, қоғамды екіге бөлді.
Бір тарап мұндай шараны тәртіпке шақыратын қалыпты тәсіл деп бағалап, «жігіттерді осылай шынықтыру керек» деген пікір білдірді.
Ал қарсы пікірдегі азаматтар колледж – физикалық жаза қолданатын орын емес екенін, әсіресе кәмелетке толмағандарға қатысты мұндай әдістердің білім беру процесіне еш қатысы жоқ екенін алға тартып отыр.