Эпштейн ісінде Келімбетов пен Мәсімовтің есімі қайта аталды

SMARTNEWS.KZ басылымының хабарлауынша, Джеффри Эпштейн ісіне қатысты жарияланған жаңа құжаттарда Қазақстанның бұрынғы жоғары лауазымды шенеуніктерінің есімдері тағы да аталды.

Orda.kz жазуынша, АҚШ Әділет министрлігі жариялаған 2014–2015 жылдарға қатысты хат-хабарлар мен жазбаларда экс-Ұлттық банк төрағасы әрі бұрынғы премьер-министрдің орынбасары Қайрат Келімбетовтің, сондай-ақ мемлекетке опасыздық жасағаны үшін сотталған экс-премьер Карим Мәсімовтің аты көрсетілген.

АҚШ Әділет министрлігі ашық қолжетімділікке шығарған материалдарда Джеффри Эпштейннің түрлі тұлғалармен электронды пошта және мессенджерлер арқылы жүргізген хат алмасулары берілген. Бірқатар жазбаларда Қайрат Келімбетовтің есімі, оның сол кездегі қызметтері және жоспарланған кездесулер туралы мәліметтер кездеседі.

Құжаттардың бірінде Эпштейннің хат алмасуы АҚШ-тың бұрынғы қаржы министрі Ларри Саммерспен жүргізілген болуы мүмкін екені көрсетілген.

Материалдарда 2014 жылғы 20 қазанда өтуі тиіс кездесу дайындығына жеке назар аударылған. Жазбаларға сәйкес, кездесуді үйлестірумен, болжам бойынша, норвегиялық дипломат Терье Рёд-Ларсен айналысқан. Ол Қайрат Келімбетовтің Темірлан Мұханбетжанов есімді көмекшісімен байланысқа шыққан.

Тағы бір хат алмасуда Оливер Колома Эпштейннен:

«Мәсімовке айтып беруімді қалайтын бірдеңе бар ма?» – деп сұрайды.

Эпштейн оған:

«Жай ғана жақсылап әңгімелес», – деп жауап берген.

Сол жазбаларда Эпштейн «Нью-Йоркте бірге көңілді уақыт өткізгенін» айтып, Қайрат Келімбетовке «сәлем мен құшақ жолдауды» сұрағаны да көрсетілген.

Алайда жарияланған материалдардың ашық бөлігінде Джеффри Эпштейн мен Карим Мәсімовтің жеке кездескенін дәлелдейтін нақты дерек жоқ.

Құжаттардың жариялануы «Эпштейн файлдарын ашу туралы» заң аясында жүзеге асқан ауқымды ақпараттық жарияланымның бір бөлігі болды. Бұл заңға АҚШ-тың қазіргі президенті Дональд Трамп қол қойған. АҚШ Әділет министрлігінің сайтында үш миллионнан астам беттен тұратын материалдар – хаттар, жазбалар және ішкі құжаттар орналастырылған.