RUS
SMARTNEWS.KZ басылымының хабарлауынша, Australian Open–2026 турниріндегі сәтті өнерінен кейін қазақстандық теннисші Заңғар Нұрланұлы ITF Juniors әлемдік рейтингінде айтарлықтай жоғарылады.
Қазақстан теннис федерациясының мәліметінше, Түркістан қаласының тумасы рейтингте 12-орыннан 9-сатыға көтеріліп, мансабында алғаш рет әлемнің үздік он жас теннисшісінің қатарына кірді.
Нұрланұлы 2026 жылғы жасөспірімдер арасындағы Аустралияның ашық чемпионатында жекелей сында жартылай финалға дейін жетіп, Қазақстан теннисі тарихында жаңа белес орнатты. Бұған дейін елімізден бірде-бір спортшы юниорлар арасындағы Australian Open турнирінде жартылай финалға шығып көрмеген.
Бұдан бөлек, ол 2025 жылдың күзінде US Open Juniors турнирінде де жартылай финалға дейін жеткен болатын. Осылайша Заңғар Нұрланұлы жасөспірімдер арасындағы «Үлкен дулыға» сериясындағы турнирлерде екі рет жартылай финал ойнаған Қазақстан тарихындағы алғашқы теннисші атанды.
Қазіргі таңда бірден үш қазақстандық спортшы WTA, ATP және ITF Juniors рейтингтерінің үздік ондығында тұр.
Атап айтқанда, Australian Open–2026 чемпионы Елена Рыбакина әлемдік рейтингте үшінші орында орналасқан. Александр Бублик — оныншы сатыда. Ал Заңғар Нұрланұлы — тоғызыншы орында.