RUS
SMARTNEWS.KZ басылымының хабарлауынша, Мәжіліс отырысында депутат Ермұрат Бәпи қазақ тілін өзгелерге күшпен тықпалаудың қажеті жоқ екенін айтты. Оның пікірінше, тілді текетірес пен ерегістің құралына айналдыру қоғамға еш пайда әкелмейді.
“Әрине, азаматтық ұстаныммен айтылатын сынға шектеу болмауы тиіс. Бірақ тілге қатысты сын мен талапты ерегісу құралына айналдыру қажет емес. Өзінің тілін өзгеге өктемдікпен тықпалаған идеялар пайда болған заманда, есермен егесу – естінің ісі болмайды”, – деді депутат.
Бәпи жаңа Конституция жобасына байланысты қоғамдық пікірлерге де тоқталып, ұлттық намыс пен мемлекеттілікті сақтаудың маңызын атап өтті. Депутаттың айтуынша, жаңа Конституцияда орыс тілі бұрынғыдай ресми тіл мәртебесінде қалды. Сонымен бірге, мемлекет қазақ тілін үйретуге арналған жобаларға – мысалы, Steppe Rider ойынына – бюджеттен 242 миллион теңге бөлінгенін еске салды.
“Үлес салмағы 70 пайыздан асқан халық өзінің тілін өзгеге өктемдікпен емес, байыппен үйреткені – әлдеқайда тиімді. Тілді текетірес қаруы етуге болмайды”, – деді Бәпи.