RUS
SMARTNEWS.KZ басылымының хабарлауынша, Германия соты Қазақстанның бұрынғы прокуроры Мақсат Дүйсеновті елге экстрадициялау туралы өтінішті қанағаттандырудан бас тартты.
Құқық қорғаушылардың мәліметінше, неміс соты Дүйсеновке қатысты қылмыстық қудалау саяси сипатта болуы мүмкін деген қорытындыға келген. Осыған байланысты ол бостандыққа шығарылып, Қазақстанның экстрадициялау жөніндегі ресми сұрауы күшін жойды.
Мақсат Дүйсенов бұған дейін Германиядан саяси баспана сұраған.
Қазақстанда оған қылмыстық жолмен алынған кірістерді заңдастыру, алаяқтық және пара алу баптары бойынша айып тағылып отыр. Тергеу материалдарында экс-прокурордың 22 миллион доллар көлемінде пара алғаны көрсетіледі.
Экстрадиция сұрауына негіз болған қылмыстық істің қоғамда үлкен резонанс туғызғаны, сондай-ақ іс барысында сыртқы қысым болғаны жөнінде қорғау тарапы да мәлімдеген.
Дүйсенов Алматы прокуратурасы тарапынан іздеуге жарияланған. Бұған дейін ол Қазақстанның сұрауы бойынша Германия аумағында Интерпол арқылы ұсталған.
Алайда Германияда саяси баспана сұрауы экстрадиция рәсімін уақытша тоқтатуға мүмкіндік берген.
Мақсат Дүйсенов бұған дейін Қайрат Қожамжаров құқық қорғау органдарын басқарған кезеңде оның командасында жұмыс істеп, бірқатар жауапты лауазымдарды атқарған. Қожамжаров Сенатқа кеткеннен кейін Дүйсенов те мемлекеттік қызметтен кеткен.
Қазіргі уақытта Қазақстан тарапы экстрадициялау туралы жаңа өтініш жолдай ма, жоқ па – әзірге белгісіз.