RUS
SMARTNEWS.KZ басылымының хабарлауынша, Қазақстанның арнайы мақсаттағы бөлімшелері Дубайда өтіп жатқан UAE SWAT Challenge халықаралық турнирінің алғашқы күнін сенімді әрі әсерлі нәтижемен аяқтады.
Сайысқа әлемнің 48 елінен келген күштік құрылымдардың 109 командасы қатысып отыр. Соның ішінде Қазақстан атынан сынға түскен төрт команда да турнир кестесіндегі алғашқы ондыққа енді.
Жарыс қорытындысы бойынша «Kazakhstan C» командасы көш бастады. Екінші орынға «Kazakhstan D» жайғасты. «Kazakhstan B» құрамасы төртінші нәтиже көрсетсе, «Kazakhstan A» командасы алғашқы ондықты түйіндеп, 10-орынға тұрақтады.
Ел намысын қорғаған әйелдер құрамасы — «Tomiris» жалпы есепте 20-орында. Дегенмен, ол әйелдер командалары арасында көш бастап тұр.
Мемлекеттік күзет қызметінің мәліметінше, барлық командалар бірыңғай мемлекеттік тудың астында өнер көрсетіп жатыр. Құрамға Қазақстан Республикасының Мемлекеттік күзет қызметі, Ұлттық қауіпсіздік комитеті және Ішкі істер министрлігінің арнайы бөлімшелерінде қызмет ететін үздік мамандар енген.
Турнир бес жарыс күнінен тұрады және 11 ақпанда мәресіне жетеді.