RUS
SMARTNEWS.KZ басылымының хабарлауынша, Алматы тауларында 67 жастағы турист әйел құлап, ауыр жарақат алып, шұғыл түрде құтқарылды.
Қазақстан Республикасы Төтенше жағдайлар министрлігі мәліметінше, 112 пультіне хабарлама Бутаков шатқалы аумағынан түскен. Оқиға теңіз деңгейінен 2 мың метрден жоғары биіктікте болған.
Алдын ала дерек бойынша, 1959 жылы туған әйел жорық кезінде құлап, жамбас тұсынан ауыр жарақат алған. Ол өздігінен қозғала алмаған.
Дабыл түскен бойда оқиға орнына Құтқару қызметінің мамандары, Алматы қаласының ТЖ департаментіне қарасты құтқару бөлімшелері және апат медицинасы орталығының дәрігерлері жіберілген.
Жоғары өтімді арнайы техниканың көмегімен құтқарушылар зардап шеккен адамға небәрі 30 минуттың ішінде жетіп, алғашқы медициналық көмек көрсетті.
Кейін әйел таулы бедерден қауіпсіз түсіріліп, ауруханаға жеткізілді. Онымен бірге жүрген қызы да авариялық-құтқару көлігімен эвакуацияланды.
Оқиға Алматы таулы аймағында тіркелді.