RUS
SMARTNEWS.KZ басылымының хабарлауынша, Павлодарда әскерге шақырудан «босатып беремін» деп ақша алған қорғаныс істері жөніндегі департаменттің офицері алаяқтық үшін сотталды. Бұл туралы Tengrinews.kz жазды.
Іс материалдарына сәйкес, әскерге шақырту алған бірнеше жас жігіт таныстары арқылы Павлодар облысының қорғаныс істері жөніндегі департаментінде қызмет атқарған 32 жастағы офицерге шыққан. Ол мерзімді әскери қызметтен босатып беруге уәде етіп, ақшалай сыйақы талап еткен.
«Қызмет құны» 250 мың теңгеден 1,4 млн теңгеге дейін өзгеріп отырған. Қаражаттың бір бөлігі қолма-қол берілсе, енді бір бөлігі әскери қызметкердің туыстарының банк карталарына аударылған. Эпизодтардың бірінде запастағы әскери міндетті азамат та әскери жиындардан құтылу үшін оған жүгінген.
Сотта айыпталушының әскерден босату мәселесіне ықпал ете алмайтынын біле тұра, азаматтарды әдейі алдап, ақшасын иемденгені анықталды. Іс бойынша барлығы төрт эпизод тіркелген. Келтірілген жалпы залал сомасы 3,6 млн теңгені құрады.
Кейін барлық шақырылушыларды әскери-дәрігерлік комиссия денсаулығына байланысты уақытша жарамсыз деп таныған. Осыдан кейін олар құқық қорғау органдарына арыз түсірген. Жәбірленушілердің қатарында бір шақырылушының анасы да бар. Ол өзіне 1 млн теңге көлемінде залал келтірілгенін мәлімдеген.
Арыздар Қазақстан Республикасының Ұлттық қауіпсіздік комитетіне жолданған.
Айыпталушы кінәсін толық мойындады. Сот жазаны жеңілдететін мән-жай ретінде өкініш білдіруін, тергеуге көмектесуін, кәмелетке толмаған балаларының болуын және келтірілген залалды өз еркімен өтеуін ескерді. Ал ауырлататын мән-жай ретінде әскери антты бұзуы танылды.
Істі қараған Семей гарнизонының әскери соты офицерді Қылмыстық кодекстің 190-бабы 3-бөлігінің 2 және 4-тармақтары бойынша (мемлекеттік функцияларды орындауға уәкілетті адам жасаған, бірнеше рет жасалған алаяқтық) кінәлі деп таныды.
Сот үкімімен ол ұрланған соманың сегіз еселенген мөлшерінде – 29,2 млн теңге айыппұл төлеуге міндеттелді. Үйқамақта отырған уақыты есепке алынып, нақты төленетін сома 28 464 750 теңге болып белгіленді.
Сонымен қатар сотталған азамат «лейтенант» әскери атағынан айырылып, өмір бойына мемлекеттік қызметте және квазимемлекеттік секторда лауазым атқару құқығынан шеттетілді. Айыппұл алты ай ішінде төленуі тиіс.
Бұдан бөлек, жәбірленушілерге өтемақы қорының пайдасына 78 640 теңге өндірілді. Тергеу кезінде тәркіленген 250 мың теңге мемлекет кірісіне өткізілді.
Үкім заңды күшіне енген жоқ.