RUS
SMARTNEWS.KZ басылымының хабарлауынша, Павлодар облысында бұрынғы серіктестерін ұзақ уақыт бойы аңдыған екі ер адамға қатысты қылмыстық істер қозғалды. Оқиғалар Павлодар облысы аумағында тіркелді.
Істер азаматтарды заңсыз қудалаудың алдын алуға бағытталған «Stop сталкинг» республикалық акциясы аясында қозғалған.
Бірінші жағдай Ертіс ауданында тіркелді. Аудан орталығының тұрғыны бұрынғы күйеуінің өзін жүйелі түрде аңдып, әлеуметтік желілер арқылы қайта-қайта жазып, оның еркінен тыс байланыс орнатуға тырысатынын айтып, полицияға арызданған. Ер адамға қатысты процессуалдық мәжбүрлеу шарасы ретінде келу міндеттемесі белгіленді.
Екінші дерек Павлодар қаласында анықталды. Әйел адам бұрынғы жігітінің соңғы бес жыл бойы өзін қудалап жүргенін мәлімдеген. Оның айтуынша, күдікті тұрақты түрде балағат сөздер жолдап, қоқан-лоқы көрсеткен. Күдікті қалалық полиция басқармасының уақытша ұстау изоляторына қамалды.
Полиция сталкинг — адамның еркіне қарсы байланыс орнатуға тырысу, аңду немесе бақылау арқылы көрінетін заңсыз және табанды қудалау екенін ескертеді. Құқық қорғау органдары азаматтарға қудалауға жол бермейтінін ашық білдіруге, барлық фактілерді тіркеуге және дер кезінде полицияға жүгінуге кеңес береді.