RUS
SMARTNEWS.KZ басылымының хабарлауынша, Таразда аялдамада тұрған 13 жастағы қызды бейтаныс екі ер адам көлікке күштеп отырғызуға әрекеттенді. Оқиға күндіз болған.
Бейнежазбада жеңіл көлік аялдама жанына тоқтап, жүргізушінің түсіп, баланы қолынан тартып, салонға сүйреп кіргізбек болғаны көрінеді. Сол сәтте көліктегі екінші ер адам да оған көмектесуге ұмтылған. Алайда аялдамада тұрған ересек азамат дереу араласып, қызды қорғап қалған. Күдіктілер оқиға орнынан із суытқан.
Қыздың айтуынша, ер адамдардың бірінің басында ақ түсті бас киім болған.
Жамбыл облысының полиция департаменті мәліметінше, полицейлер күдіктілерді жедел іздестіру барысында ұстап, уақытша ұстау изоляторына қамаған.
«Полицияға аялдамада тұрған кәмелетке толмаған қызды екі белгісіз адамның автокөлікпен алып кетпек болғаны туралы хабарлама түсті. Аталған дерек бойынша сотқа дейінгі тергеп-тексеру басталды. Күдіктілер ұсталып, уақытша ұстау изоляторына қамалды», – деп хабарлады ведомство.
Қазір оқиғаның барлық мән-жайын анықтауға бағытталған тергеу әрекеттері жүргізіліп жатыр. Балалардың қауіпсіздігіне қол сұғатын кез келген әрекет құқық қорғау органдарының ерекше бақылауында болатыны атап өтілді.