RUS
SMARTNEWS.KZ басылымының хабарлауынша, Алматы облысында 11-сынып оқушысы физика сабағында партаның үстінен секіріп шығып, кейін сотқа дейін жеткенімен, әкімшілік жауапкершіліктен босатылды.
23 қаңтарда Талғар ауданындағы мектептің физика сабағында 2008 жылы туған оқушы жанында отырған сыныптасының рұқсат бермеуіне байланысты партаның үстінен секіріп дәретханаға шығып, кейін қайта оралып, мұғалімнен кешірім сұрап, партаны сүрткен.
Оқиға видеожазба мен мұғалімнің куәліктерімен расталды. Оқушы бұзақылық әрекеттерге жол бермеген, балағат сөз айтпаған.
Талғар аудандық соты 2026 жылғы 4 ақпандағы шешімімен әкімшілік құқық бұзушылық белгілері жоқ деп, іс бойынша өндірісті тоқтатты. Сондай-ақ, полиция инспекторының кәмелетке толмаған баланың қорғаушысы қатыстырмай протокол жасағаны үшін Алматы облысының ПД басшылығына және Талғар ауданы полиция басқармасына жеке қаулы шығарылды. Шешім заңды күшіне енді.