Ақмола облысында Астанаға заңсыз ет тасыған екі көлік ұсталды
Екі көліктен он ірі қара ұшасы тәркіленді.
SMARTNEWS.KZ басылымының хабарлауынша, Ақмола облысында Астанаға заңсыз ет тасымалдаған екі көлік тоқтатылды.
Ақмола облысы полиция департаменті таратқан ақпаратқа сәйкес, полицейлер «Газель» маркалы автокөлікті тексеру кезінде жүк бөлімінен ірі қара малдың төрт тұтас ұшасын анықтаған. Жүргізуші тасымалданып жатқан етке қатысты ветеринарлық анықтамалар мен ілеспе құжаттардың жоқ екенін бірден мойындаған.
Дәл сол бағытта, сол уақытта тағы бір көлік тоқтатылды. Бұл жолы минивэннің ішінен алты ірі қара ұшасы табылған. Жүргізушінің айтуынша, ет Астана қаласында сатылуы тиіс болған.
Екі жағдайда да жүкке қатысты ветеринарлық және ілеспе құжаттар болмаған. Бұл қолданыстағы талаптарды тікелей бұзу болып саналады. Көлік жүргізушілері жақын маңдағы полиция бөліміне жеткізіліп, материалдар заңнамаға сәйкес қаралып жатыр.
Ведомство өкілі, полиция капитаны Бақыт Қабкеш азаматтардың жеке шаруашылығынан алынған етті құжатсыз тасымалдауы жиі кездесетінін атап өтті.
Оның сөзінше, ветеринарлық анықтамалардың болмауы өнімнің қауіпсіздігіне күмән туғызады. Себебі құжаттар еттің ауру малдан алынбағанын әрі ұрланған малға қатысы жоқ екенін растайды.
Полиция азаматтарды ет өнімдерін тасымалдау кезінде міндетті түрде барлық ветеринарлық және ілеспе құжаттарды алып жүруге шақырды.
Материал авторы
