RUS
SMARTNEWS.KZ басылымының хабарлауынша, Қостанай қалалық соты сапасыз кәмпитке байланысты тұтынушының талабын ішінара қанағаттандырып, әйел адамға 250 мың теңге моральдық өтемақы өндіру туралы шешім шығарды. Азаматтық істі Қостанай қалалық соты қараған.
Сот материалдарына сәйкес, талапкер былтыр қыркүйек айында Қостанай қаласындағы супермаркеттердің бірінен кәмпит сатып алған. Алайда келесі күні қаптаманы ашқанда, өнімнің ішінен зиянкес жәндіктерді байқаған.
Әйел адам уәкілетті органға жүгінгеннен кейін, кәмпиттің паразиттермен залалданғаны ресми түрде расталған.
Талапкер соттан моральдық зиян үшін 2 млн теңге өндіріп беруді сұраған. Ол сапасыз өнімнен кейін күйзеліс пен жиіркеніш сезімін бастан өткергенін, сондай-ақ балаларына жарамсыз тауар алып бергені үшін өзін кінәлі сезінгенін көрсеткен.
Жауапкер тарап – жауапкершілігі шектеулі серіктестік – сотта тауардың сапасыз болғанын мойындады. Алайда денсаулыққа зиян келтірілгені дәлелденбегенін алға тартып, өтемақы мөлшерімен келіспейтінін мәлімдеді. Компания өз еркімен 200 мың теңге төлеуге дайын екенін жеткізген.
Сот тауардың сапасыз сатылғаны даусыз екенін, бұл дерек жауапкер тарапынан да теріске шығарылмағанын атап өтті.
Сонымен бірге денсаулыққа нақты зиян келмегенін, сатушы тарапынан кешірім сұралғанын және келтірілген шығынның ерікті түрде өтелгенін ескере отырып, сот моральдық өтемақы көлемін 2 млн теңгеден 250 мың теңгеге дейін қысқартты.
Сот шешімі заңды күшіне енген жоқ.