RUS
SMARTNEWS.KZ басылымының хабарлауынша, Павлодарда зорлау дерегі бойынша бұрын жәбірленуші ретінде танылған қызға қатысты сот үкімі шықты. Кейін тергеу мен сот барысында берген жауабын өзгертіп, жалған айғақ айтқаны үшін ол қылмыстық жауапкершілікке тартылды.
Сот материалдарына сәйкес, 2025 жылдың мамыр айында 22 жастағы қыз бен 35 жастағы ер адам бір пәтерде болған. Тергеу органдары ер адам қыздың келісімінсіз жақындыққа мәжбүрлеген деген қорытындыға келген.
Аталған іс 2025 жылғы қазан айында Павлодар қаласының қылмыстық істер жөніндегі ауданаралық сотында қаралып, айыпталушыға қатысты үкім шыққан.
Сот үкімін жариялаған судья Өрнек Әбжапаров Қылмыстық кодекстің 58-бабы 3-бөлігіне сәйкес, бірнеше қылмыс бойынша жазалар ішінара қосылып, ер адам 5 жыл 2 ай мерзімге бас бостандығынан айырылғанын мәлімдеді.
Алайда негізгі іс қаралып жатқан сот отырысы кезінде жәбірленуші бастапқы жауабынан бас тартып, жақындық өзара келісіммен болғанын айтқан.
Соған қарамастан, сот жиналған дәлелдемелер мен куәліктер зорлау дерегін растады деген қорытындыға келді.
Кейіннен қыздың әрекетіне бөлек құқықтық баға беріліп, жалған айғақ беру фактісі бойынша жаңа қылмыстық іс қозғалды. Ол сотта өз сөзін ер адамның таныстары мен туыстары тарапынан қысым көргеннен кейін өзгерткенін түсіндірген.
Нәтижесінде сот оны жалған айғақ бергені үшін кінәлі деп танып, 5 жыл мерзімге шартты түрде бас бостандығынан айыру жазасын тағайындады.