RUS
SMARTNEWS.KZ басылымының хабарлауынша, Әзербайжан билігі Нахчыванға жасалған дрон соққысынан кейін армияны жоғары дайындыққа көшірді. Ресми Баку бұл шабуыл үшін Иранды айыптап отыр.
Әзербайжан президенті Ильхам Әлиев Нахчыван эксклавына жасалған болжамды дрон шабуылынан кейін елдің қарулы күштерін жауынгерлік дайындық режиміне көшіру туралы бұйрық берді. Бұл туралы Әзербайжанның мемлекеттік ақпарат агенттігі Azertag хабарлады.
Бұған дейін ұшқышсыз ұшу аппараттары Нахчывандағы әуежайға және мектеп маңына соққы жасағаны белгілі болды.
Бакуде өткен ұлттық қауіпсіздік кеңесінің отырысында Әлиев бұл шабуыл үшін Иранды жауапты деп атады.
Мемлекет басшысы Әзербайжан мұндай әрекетті «жиіркенішті террористік акт» деп бағалайтынын айтып, Тегераннан ресми түсініктеме талап етті.
«Иранның ресми тұлғалары бұл оқиғаға қатысты түсініктеме беріп, Әзербайжан халқынан кешірім сұрауы тиіс. Террористік әрекетке қатысы бар адамдар қылмыстық жауапкершілікке тартылуы керек», – деді Әлиев.
Ал Иран тарапы бұл айыптауларды жоққа шығарып отыр. Немістің Bild басылымы Тегеран аталған шабуылға қатысы бар екенін мойындамағанын жазды.