Атырауда із-түзсіз жоғалған Наурыз бен Мирамгүлдің мәйіті табылды
Атырауда жоғалған ерлі-зайыптының өліміне қатысты күдікті, отбасының күйеу баласы Сұлтан Сәрсемәлиев мәйітті қайда көмгенін айтып берді.
SMARTNEWS.KZ басылымының хабарлауынша, Атырау маңындағы Геолог ықшамауданынан бұған дейін жоғалып кеткен Жангелдин ауылының тұрғындары Наурыз бен Мирамгүлдің мәйіттері табылды.
Мәйіттер күдікті Сұлтан Сәрсемалиев жұбайы Ақбаянмен бірге бұрын жалдап тұрған үйдің ауласынан шыққан.
Кеше Сұлтан Сәрсемалиев пен оның жұбайы Алматыға жеткізілген. Сол жерде күдікті Наурыз бен Мирамгүлді өлтіргенін мойындап, олардың денесін Геолог ықшамауданындағы жалдап тұрған үйдің ауласына көмгенін айтқан.
Осы мәліметтен кейін Атыраудағы тергеушілер көрсетілген аумақта қайта қазба жұмыстарын жүргізіп, нәтижесінде мәйіттерді тапқан.
Еске салсақ, жоғалған адамдарды іздеу жұмыстары өткен жылдың желтоқсан айынан бері жүргізіліп келген. Операцияға полиция қызметкерлері мен Ұлттық ұлан сарбаздары тартылып, арнайы жылжымалы штаб құрылған.
Үй аумағы мен маңайдағы жер телімдері арнайы техникамен, соның ішінде георадарлармен тексерілген. Алайда алғашқы іздеу шаралары нәтиже бермеген еді.
Материал авторы
