Қазақстандық 7 жастағы қыз алты айдан кейін Грузиядан елге қайтарылды
Қазақстан дипломатының көмегімен 7 жастағы қыз елге оралды.
SMARTNEWS.KZ басылымының хабарлауынша, Грузия аумағында болған жеті жастағы Қазақстан азаматы елге қайтарылды. Бұл туралы Қазақстан Республикасының Оқу-ағарту министрлігі хабарлады.
Ведомство мәліметінше, баланы елге қайтару жұмыстары шамамен алты айға созылған. Процесс Қазақстанның Грузиядағы елшілігі мен министрлік арасындағы бірлескен жұмыстың нәтижесінде жүзеге асқан.
Осы уақыт ішінде тараптар дипломатиялық арналар арқылы келіссөз жүргізіп, Грузияның құзырлы органдарымен байланыс орнатқан. Сонымен қатар қажетті құжаттар рәсімделіп, барлық құқықтық процедуралар аяқталған.
Министрлік мәліметінше, қазіргі уақытта қыз бала қауіпсіз жерде. Оған қажетті психологиялық көмек көрсетіліп жатыр. Сондай-ақ оның алдағы отбасылық жағдайын заң талаптарына және баланың мүддесіне сай реттеу жұмыстары жүргізілуде.
Ведомство баланың жеке деректері мен оның Грузияда болу жағдайына қатысты ақпарат жарияланбайтынын атап өтті. Бұл шешім баланың қауіпсіздігі мен жеке өмірін қорғау мақсатында қабылданған.
Министрлік өкілдері балалардың құқықтары мен заңды мүдделерін қорғау мемлекет үшін ел ішінде де, шетелде де басты міндеттердің бірі екенін мәлімдеді.
Айта кетейік, 2025 жылдың желтоқсанында Қазақстан билігі Ұлыбритания аумағынан бір жасар қазақстандық баланы елге қайтаруға қол жеткізген.
Материал авторы
