«Тергеу барысында жүргізушінің жүргізуші куәлігі күмән тудырды. Арнайы сараптама оның жалғандығын анықтады. Бұл факті тағы бір қылмыстық істі тіркеуге негіз болды. Жақында сот үкімі шықты», - деді Алматы қаласы Полиция департаменті анықтау басқармасының бастығы Олжас Шәріпов.
Медеу ауданының №2 сотының қаулысымен 29 жастағы азамат Ж. ҚР Қылмыстық кодексінің 385-бабы 2,3-бөлігі бойынша қылмыстық құқық бұзушылық жасағаны үшін кінәлі деп танылып, екі жылға бас бостандығын шектеу және 80 сағат қоғамдық жұмысқа тарту жазасына кесілді.
Полиция өкілінің айтуынша, қоғамдық көлік жүргізушісі 2022 жылдың қазан айында Төле би даңғылымен шығыс бағытта келе жатып, белгіленбеген жерден жолдың оңтүстігіне қарай өтіп бара жатқан әйелді қағып кеткен. Сот-медициналық сараптаманың қорытындысына сәйкес, жол-көлік апаты салдарынан оның денсаулығына ауыр зиян келген.