Ақтауда әйелдерді «жируха» деп келемеждеген фитнес жаттықтырушысы жұмыстан қуылды
Жаттықтырушы әлеуметтік желіде әйелдерді қорлаған.
SMARTNEWS.KZ басылымының хабарлауынша, Ақтау қаласында фитнес орталықтарының бірінде жұмыс істейтін жаттықтырушы әлеуметтік желідегі жазбалары үшін қызметінен шеттетілді. Оған артық салмағы бар әйелдерді келемеждегені үшін қала тұрғындары шағымданған.
Жанжал жаттықтырушы өзінің әлеуметтік желідегі парақшасында артық салмағы бар әйелдерді мазақ еткен суреттер мен жазбалар жариялағаннан кейін басталған. Скриншоттар қысқа уақыт ішінде түрлі чаттар мен пабликтерге тарап, қоғамда қызу талқылауға ұласты.
Мысалы, жарияланған суреттердің біріне ол: «Егер сен семіз болмасаң – гүл шоғын алып кет» деген жазба қалдырған. Ал тағы бір жазбасында: «Қысқасы, тәттілер жоқ. Семіздер өздерінің жалған жаттықтырушыларымен бірге жеп қойған сияқты» деген мазмұнда пікір білдірген.
Бұл жазбалар әлеуметтік желілерде тарағаннан кейін ақтаулық әйелдер жаттықтырушының сөздерін қатаң сынға алды. Олардың айтуынша, спорт маманы адамдарды ынталандырып, қолдау көрсетуі тиіс, ал мұндай келемеж сөздер кәсіби этикаға қайшы келеді.
Фитнес орталығының әкімшілігі бұл жағдайға қатысты түсініктеме беріп, жаттықтырушының жарияланымдары клубтың құндылықтарына сәйкес келмейтінін мәлімдеді. Ішкі тексеріс жүргізілгеннен кейін ол уақытша қызметінен шеттетілген.
Айта кетейік, зерттеулерге сәйкес, Қазақстанда ересек тұрғындардың жартысынан астамында артық салмақ бар. Алайда мамандар бұл жағдай адамдарды қорлауға емес, керісінше, денсаулыққа қатысты қолдау мен түсіндіру жұмыстарына негіз болуы тиіс екенін атап өтеді.
Материал авторы
