Фотоны өзгертіп қорқытқан: TikTok-тағы таныстық бопсалауға айналды
Қызды қорқытып ақша сұраған ер адам ұсталды.
SMARTNEWS.KZ басылымының хабарлауынша, Ақмола облысында әлеуметтік желідегі таныстық қылмыспен аяқталды. Жергілікті тұрғын бопсалауға ұшырап, полицияға жүгінген.
Облыстық полиция департаментінің мәліметінше, оқиға Целиноград ауданында тіркелген. Қыз TikTok желісінде бір жігітпен танысып, біраз уақыт хат алмасқан. Кейін байланысын үзуді шешкен.
Алайда күдікті бұған тоқтамаған. Тергеу дерегіне сәйкес, ол қыздың фотосуреттерін арнайы редактор арқылы өзгертіп, жалған материал дайындаған. Содан кейін сол суреттерді интернетке таратамын деп қорқытып, ақша талап еткен.
Жәбірленуші жағдайдың заңсыз екенін түсініп, полицияға арызданған. Құқық қорғау органдары дәлелдерді жинап, қылмыстық іс қозғаған.
Қазіргі уақытта күдіктінің жеке басы анықталған. Тергеу амалдары жалғасып жатыр.
Полиция мұндай жағдайлардың алдын алу үшін азаматтарға бейтаныс адамдармен жеке мәліметтер мен фотоларды бөліспеуге кеңес береді.
Материал авторы
