Қазақстандық теннисші екінші айналымда әлемнің 62-ракеткасы, ресейлік Анна Калинскаямен шеберлік байқасты.
Осыған дейін қарсыластар екі мәрте кездесіп, бір-бірден жеңіске жеткен еді. Биыл Майами мастерс жарысының екінші айналымында Е.Рыбакина А.Калинскаяны тартысты бәсекеде 7:5, 4:6, 6:3 есебімен ұтқан болатын.
Бұл жолы бірінші партияда есеп 5:5 болған мезетте ресейлік спортшы брейк жасап, өз геймін де алды – 7:5.
Екінші сетте есеп 2:2 болғанда, теннисшілер брейкпен алмасты. Бұл партияны Елена тағы бір брейкпен бітірді – 6:4.
Үшінші, шешуші партияны Е.Рыбакина сәтсіз бастады – 0:2. А.Калинская тағы бір брейк жасап, есепті 5:1-ге жеткізді. Содан кейін матчқа доп бергенде, өз мүмкіндігін жіберген жоқ – 6:2.
Екі сағат 14 минутқа созылған бәсеке барысында Е.Рыбакина 10 эйс жасап, 12 брейк-пойнттың екеуін ғана пайдалана алды. Ресейлік спортшы 9 эйс, 4 брейкпен (9 брейк-пойнт) көзге түсті.
А.Калинская үшінші айналымда әлемнің 33-ракеткасы, хорватиялық Петра Мартич немесе рейтингте 128-орында тұрған германиялық Лаура Зигемундтың біреуімен кездеседі.
Е.Рыбакина өткен жылы Мадрид мастерс жарысының үшінші айналымына дейін жеткен еді. Биыл сол жетістігін қайталай алмай, ұпайларын да жоғалтты.