RUS
SMARTNEWS.KZ басылымының хабарлауынша, 2 сәуірде Қазақстанның 13 қаласында қолайсыз метеорологиялық жағдайлар күтіледі. Бұл туралы «Қазгидромет» мәлімдеді.
Синоптиктердің мәліметінше, аталған күні Петропавл, Көкшетау, Павлодар, Қарағанды, Жезқазған, Балқаш, Теміртау, Атырау, Өскемен, Риддер, Семей, Алматы және Астана қалаларында ауа ластануының деңгейі артуы ықтимал.
Қолайсыз метеорологиялық жағдайлар — желсіздік, әлсіз жел, тұман және температуралық инверсия сияқты факторлардың жиынтығы. Мұндай кезде зиянды заттар ауада таралмай, жерге жақын қабатта жиналып қалады.
Соның салдарынан елді мекендерде атмосфералық ауаның сапасы нашарлап, бұл тұрғындардың денсаулығына кері әсер етуі мүмкін.
Мамандардың айтуынша, ауа ластануы деңгейінің қалыптасуына желдің бағыты мен жылдамдығы, жауын-шашын, ылғалдылық және ауа температурасы тікелей ықпал етеді.
Осыған байланысты тұрғындарға бірқатар сақтық шараларын сақтау ұсынылады. Атап айтқанда, ашық ауада, әсіресе көлік жолдары мен ластану көздерінің маңында ұзақ болмау керек. Балалар мен жүкті әйелдерге серуенді шектеу ұсынылады.
Созылмалы өкпе, жүрек-қан тамырлары немесе аллергиялық аурулары бар адамдар далаға шыққанда қажетті дәрі-дәрмектерін өзімен бірге алып жүргені жөн. Сондай-ақ ашық ауадағы физикалық белсенділікті азайтып, спортпен жабық ғимараттарда айналысқан дұрыс.