RUS
SMARTNEWS.KZ басылымының хабарлауынша, Маңғыстау облысында екі ағайындының арасындағы жанжал төбелеске ұласып, оқиға орнына полиция шақырылды. Бұл туралы өңірлік полиция департаменті хабарлады.
Әлеуметтік желіде 11-шағынауданда түсірілген бейнежазба тарады. Кадрларда құқық қорғау органдары қызметкерлері мен арнайы жасақтың көптеп жиналғаны көрінеді. Алайда полиция бұл жағдайдың арнайы операцияға қатысы жоқ екенін нақтылады.
Ведомствоның мәліметінше, оқиға 1 сәуірге қараған түні шамамен 01:30-да №27 үйдің маңында болған. Бір үйде тұратын екі ағайындының арасындағы сөз таласы қысқа уақытта ушығып, күш қолдануға ұласқан. Алдын ала дерек бойынша, ағасы інісін соққыға жыққан.
Шуды естіген көршілер «102» нөміріне хабарласқан. Оқиға орнына полиция қызметкерлері мен арнайы мақсаттағы жасақ барған.
Қазіргі уақытта аталған дерек бойынша тексеру жүргізіліп жатыр. Полиция мәліметінше, жанжалға қатысушылардан облыстық көпбейінді ауруханаға ешқандай шағым түспеген.