RUS
SMARTNEWS.KZ басылымының хабарлауынша, сотталған Перизат Қайратқа тиесілі болған Mercedes-Benz S 450 автокөлігі мемлекеттік органдардың балансына берілді. Бұл туралы электронды сауда алаңындағы ресми мәліметтерде жарияланды.
7 сәуір күні өткен электронды сауда нәтижесінде аталған көлік мемлекеттік заңды тұлғалардың меншігіне рәсімделген. Сауда мәртебесі «өтті» деп көрсетілген.
Әңгіме 2024 жылы шығарылған, қара түсті, 777KPK01 мемлекеттік нөмірі бар көлік туралы болып отыр. Құжаттарға сәйкес, көліктің аккумуляторы отырғандықтан, техникалық жағдайын толық тексеру мүмкін болмаған. Автокөлік дабыл жүйесі бар кілтпен бірге тапсырылған. Салоны ақ былғарымен қапталған.
Көліктің бағалау құны шамамен 79,4 миллион теңгені құраған. Сондай-ақ, оған тыйым салу шаралары, яғни қамау қойылғаны көрсетілген.
Қайраттан тағы қандай мүлік тәркіленді
2025 жылдың қыркүйегінде Қаржы мониторингі агенттігі Перизат Қайраттан тәркіленген активтер аукционға шығарылатынын хабарлаған еді.
Тізімге Vela Village коттедж қалашығындағы жеке үй, Akbulak Riviera, Sensata Plaza, Highvill Ishim Gold және «Көк Жайлау» тұрғын үй кешендеріндегі бірнеше пәтер мен автотұрақ орындары кірген.
Сондай-ақ, қымбат автокөліктер — Mercedes-Benz S 450, Lexus LX 600, Mercedes-Benz EQE және Haval H6 GT тәркіленген. Бұдан бөлек, гүл бизнесіндегі 100 пайыз үлес, 97 миллион теңгеден астам қаражат және 22 мың АҚШ доллары мемлекет пайдасына алынған.
Тәркіленген мүліктер қатарында әлемдік брендтердің күннен қорғайтын көзілдіріктері, аяқ киімдері мен аксессуарлары да бар.