RUS
SMARTNEWS.KZ басылымының хабарлауынша, Жамбыл облысында отбасылық сенімді аяққа таптаған алаяқтық ісі сотта қаралып, үкім шықты. Айыпталушы – Жуалы ауданының тұрғыны, өз енесінің атына заңсыз несие рәсімдеген келін.
Іс материалдарына сәйкес, 2025 жылдың қарашасында әйел өз атына несие ала алмаған соң, басқа жол іздеген. Ол үшін енесінің жеке деректерін пайдалануға бел буған. Несие рәсімдеуге көмектесетін белгісіз адамға жүгініп, енесі бәрінен хабардар әрі келісім берген деп сендірген.
Кейін айыпталушы туысының телефонына қол жеткізіп, растау кодын өзі айтып, онлайн тексерістен енесінің атынан өткен. Осылайша, жәбірленушінің атына 1,5 млн теңге несие рәсімделген.
Сот дерегінше, аталған соманың 1,1 млн теңгесі енесінің есепшотына түскен. Алайда айыпталушы бұл қаражатты өз шотына аударып, жеке қажетіне жұмсап жіберген. Ал жәбірленуші несие туралы тек ай сайынғы төлемдер пайда болған кезде ғана білген.
Сотта айыпталушы кінәсін толық мойындап, жасаған ісіне өкінетінін айтқан. Іс бойынша кінә тараптардың жауабы мен өзге де дәлелдер арқылы толық дәлелденді.
Сот жеңілдететін мән-жайлар ретінде айыптының кінәсін мойындауын, өкінуін және кәмелетке толмаған балаларының барын ескерді.
Нәтижесінде әйел алаяқтық жасағаны үшін кінәлі деп танылып, 1 жыл мерзімге бас бостандығын шектеу жазасына кесілді. Сонымен қатар, келтірілген 1,5 млн теңге шығынды толық өтеу міндеті жүктелді. Азаматтық талап толық көлемде қанағаттандырылды.
Сот үкімі заңды күшіне енді.