RUS
SMARTNEWS.KZ басылымының хабарлауынша, Ресейдің Пермь өлкесіндегі Добрянка қаласында мектеп маңында болған шабуыл қайғылы аяқталды. Жоғары сынып оқушысы мұғалімге пышақпен шабуыл жасап, салдарынан ұстаз ауруханада көз жұмды.
Аймақ губернаторы Дмитрий Махониннің мәліметінше, оқиға сейсенбі күні таңертең №5 мектептің кіреберісінде болған. 17 жастағы жасөспірім ұстазға бірнеше рет пышақ сұғып, ауыр жарақаттаған. Мұғалім жансақтау бөлімінде көз жұмды.
Қаза болған Олеся Багута орыс тілі мен әдебиеті пәнінің мұғалімі, сондай-ақ мектеп директорының орынбасары қызметін атқарған. Ол білім беру саласына шамамен 30 жылын арнап, кәсіби еңбегімен танылған. 2018 жылы «Жыл мұғалімі» байқауының лауреаты атанған.
Ресми мәліметтерге сәйкес, марқұм педагог ұстаздар әулетінен шыққан — оның анасы да мұғалім болған. Қала билігі марқұмның отбасы мен жақындарына қажетті көмек көрсетілетінін мәлімдеді.
Алдын ала ақпарат бойынша, шабуыл жасаған оқушы тоғызыншы сыныпта оқиды және полиция есебінде тұрған. Құқық қорғау органдарының дерегінше, ол мен мұғалім арасында ұзаққа созылған жанжал болған.
Қазір қылмыстық іс қозғалып, тергеу басталды. Іс Ресей Тергеу комитетінің орталық аппаратының бақылауына алынған. Күдікті жасөспірім ұсталған.
Оқиғадан кейін Пермь өлкесіндегі мектептерде қауіпсіздік шараларын күшейту туралы шешім қабылданды.