RUS
SMARTNEWS.KZ басылымының хабарлауынша, Молдова билігі қазақстандық комик Нұрлан Сабыровтың ел аумағындағы концерттерін өткізуге қарсы шықты. Сонымен қатар әншілер Диана Арбенина мен Олег Винниктің де жоспарланған гастрольдерін тоқтату ұсынылды.
Молдова Мәдениет министрлігі бұл іс-шараларды «орынсыз» деп бағалап, ұйымдастырушыларға келісімшарттарды қайта қарауды ұсынған. Ведомство мұндай шешім ықтимал тәуекелдердің алдын алу үшін қажет екенін атап өтті. Атап айтқанда, әртістердің елге кіре алмауы немесе концерттердің соңғы сәтте тоқтатылуы сияқты жағдайлар туындауы мүмкін.
Бұған дейін Нұрлан Сабыровтың шетелдегі концерттері төңірегінде бірнеше даулы жағдай тіркелген. Атап айтқанда, оның Шанхайдағы концерті өтпей қалған. Сондай-ақ ақпанда ресейлік БАҚ-та комиктің Ресейге 50 жылға кіруіне тыйым салынғаны туралы ақпарат тараған еді. Ол кезде әртіс Мәскеудің Внуково әуежайында ұсталып, кейін Алматыға қайтып кеткен.
Қазақстанның Сыртқы істер министрлігі бұл жағдайға қатысты Сабыровтың өзі немесе оның өкілдері ресми түрде көмек сұрамағанын мәлімдеген. Кейінірек Бас прокуратура мен өзге де құзырлы органдар әлеуметтік желіде тараған ақпараттарға байланысты түсініктеме берген.
Сондай-ақ Ұлттық қауіпсіздік комитеті комикке қатысты тексеру шаралары жүргізіліп жатқанын хабарлаған. Бұл әлеуметтік желілерде тараған оның жеке әскери компанияларға қатысы бар деген мәліметтерге байланысты басталған.