RUS
SMARTNEWS.KZ басылымының хабарлауынша, Павлодар облысында жол ережесін бұзған жүргізушілерді тіркейтін камералардан айламен «қашпақ» болған әрекет әшкереленді. Жергілікті тұрғын көлігіне өзге автокөлікке тиесілі мемлекеттік нөмір тағып, жүйені алдамақ болған.
Оқиға Омбы – Майқапшағай тасжолында тіркелген. Патрульдік полиция қызметкерлері ВАЗ-21093 көлігін тоқтатып, құжаттарын тексерген. Нәтижесінде көліктегі мемлекеттік нөмірдің база бойынша басқа автокөлікке тіркелгені анықталған.
Полиция мәліметінше, жүргізушіге жалған немесе қолдан жасалған нөмір қолданғаны үшін әкімшілік хаттама толтырылған. Мемлекеттік нөмір тәркіленіп, көлік арнайы айып тұрағына қойылған.
Құқық қорғау органдары мұндай әрекеттердің салдары ауыр екенін ескертеді. Жалған нөмірлер көбіне көлік ұрлығы, заңсыз тасымал немесе айыппұлдан жалтару сияқты құқықбұзушылықтармен байланысты болуы мүмкін. Өңірдегі бейнебақылау жүйелері үздіксіз жұмыс істеп, барлық заңбұзушылықтарды тіркеуді жалғастырып отыр.