RUS
SMARTNEWS.KZ басылымының хабарлауынша, белгілі кәсіпкер Тұрсынғали Алагөзов жұбайы Баян Алагөзованың қыздары Айсәуле мен Айарумен қарым-қатынасы туралы ашық айтты. Ол бұл тақырыпты «Әке» подкастына берген сұхбатында қозғады.
Кәсіпкердің сөзінше, олардың арасындағы байланыс ресми мәртебеден емес, уақыт өте қалыптасқан шынайы сезімнен туған.
«Олар менің туған қыздарым емес. Мені “аға” деп атайды. Бұл – өмірдің өзі құрған жағдай. Олар мені таңдаған жоқ, мен де оларды таңдаған жоқпын. Бірақ тағдыр бізді бір отбасыға біріктірді», – деді ол.
Алагөзов қыздардың өз әкесі бар екенін, олармен байланысын үзбегенін де атап өтті. Соған қарамастан, өзі де олардың өмірінде жақын адамға айналғанын жасырмады.
«Олардың өз әкесі бар – оны құрметтейді, жақсы көреді. Бұл – заңды нәрсе. Мен ол араға араласпаймын. Бірақ уақыт өте біз бір-бірімізге жақындадық. Мұндай қатынаста жалғыз құрал бар – ол махаббат», – деді кәсіпкер.
Ол қыздардың мінез ерекшеліктеріне де тоқталды. Айсәулемен тіл табысу жеңілірек болса, Айарумен қарым-қатынас құру қиынырақ болған.
«Айсәуле ашық, түсінісу оңай. Ал Айару – тұйық, талапшыл. Онымен байланыс орнату оңай болған жоқ. Бірақ мен оны құрметтеймін. Оның қолынан бәрі келеді – ісмер, еңбекқор. Соған қарап сүйсінемін», – деді ол.
Кәсіпкердің айтуынша, мұндай қарым-қатынаста қиындықтар да болмай тұрмайды. Дегенмен ересек адамдар ретінде кешірім мен түсіністік басты орында болуы тиіс.
«Кейде ауыр сәттер болады. Бірақ өмір тоқтамайды. Кешіре білу керек. Кешіру – әлсіздік емес. Керісінше, ол адамның ішкі күшін көрсетеді. Сүйе білсең, өмір жеңілдейді», – деді Алагөзов.
Сұхбат барысында ол Айсәуленің күйеуі Әлішер Қайдаров туралы да пікір білдірді. Кәсіпкер оның әкесінен айырылғанын ескеріп, өзіне белгілі бір жауапкершілік жүктелгенін айтты.
«Оған бағыт-бағдар беруге тырысамын. Өмірлік тәжірибені ешқандай оқу орны толық бере алмайды. Сондықтан жақын адам ретінде көмектесу – менің міндетім», – деді ол.
Айта кетейік, бұған дейін Тұрсынғали Алагөзов бірінші некесінен туған балаларымен арақатынасын қайта қалпына келтіргені белгілі болған еді. Кейін ол оларды кіші қыздарымен таныстырып, отбасылық байланыстарды қайта жаңғыртуға қадам жасаған.