RUS
SMARTNEWS.KZ басылымының хабарлауынша, Маңғыстау облысындағы ерекше табиғи нысан — «Қамалдар алқабы» дрифт алаңына айналғаны қоғамда үлкен резонанс тудырды. Әлеуметтік желіде тараған видеода көліктердің қорғалатын аумақта дрифт жасап жүргені көрінеді.
Ақтаулық блогер Азамат Сәрсенбаев жариялаған бейнежазбада жүргізушілердің табиғи ландшафтқа еш мән бермей, сирек кездесетін аймақты бүлдіріп жатқаны анық байқалады.
Блогердің айтуынша, мұндай әрекеттер өңірдің экожүйесіне айтарлықтай зиян келтіреді.
«Бұл – Қамалдар алқабы емес, қоқыс пен вандализм орнына айналып бара жатқан аймақ. Ойсыз әрекеттердің салдарынан бірегей табиғат біртіндеп жансыз шөлге айналуда. Ал дәл осы жартастардың етегінде Қызыл кітапқа енген согдий қызғалдақтары өседі», – деп жазды ол.
«Қамалдар алқабы» Маңғыстаудың ең танымал туристік орындарының бірі саналады. Ерекше жартас пішіндері мен табиғи көріністері жыл сайын мыңдаған туристі тартады.
Видео тарағаннан кейін әлеуметтік желі қолданушылары жаппай наразылық білдірді. Көпшілік мұндай әрекеттерді табиғатқа жасалған ашық қиянат деп бағалап, жауапкершілікті күшейтуді талап етті.
Пікірлерде кейбір қолданушылар табиғи аумақтарға көлікпен кіру үшін қатаң айыппұл енгізуді ұсынса, енді бірі мұндай заңбұзушылық үшін жүргізуші куәлігінен айыру қажет екенін айтты.
Айта кетейік, бұған дейін Каспий теңізінің жағалауына жол талғамайтын көлікпен кіріп, табиғатқа зиян келтірген өзбек блогері 86 500 теңге айыппұл төлеген болатын.