RUS
SMARTNEWS.KZ басылымының хабарлауынша, қазақстандық UFC файтері Шавкат Рахмоновтың жұбайы Гүлайым ерлі-зайыптылар арасында неке шарты жасалғанын мәлімдеді. Ол бұл туралы Руслан Өтепбайдың YouTube-арнасына берген сұхбатында айтты.
Гүлайымның сөзінше, неке шарты туралы әңгіме 2025 жылдың наурыз айында Дубайға отбасылық демалыстан кейін қозғалған.
«2025 жылдың наурызында үш баламызды алып, Дубайға демалуға бардық. Содан кейін сәуір айында ол неке шарты туралы айта бастады. Басында күліп, мән бермедім. “Менде ештеңе жоқ қой. Кем дегенде тұрып жатқан үйді бер немесе бизнес ашып бер, сонда қол қоямын. Сен мені қорқып отырсың ба? Егер солай болса, неге менімен бірге тұрасың?” дедім.
Кейін ойланып қарасам, мүмкін оның жанында – анасы немесе бауырлары тарапынан “ертең ажырасса, мүлікке таласады” деген әңгімелер болған шығар. Ондай ойлар көп отбасында болады ғой. Сосын “егер Шавкат мені тек мүлік үшін бірге жүр деп ойласа, қол қояйын” деп шештім», – деді ол.
Оның айтуынша, келісімнің негізгі шарты – әркімнің өз атына рәсімделген мүлкі өзінде қалады.
«Ажырасу болса, әрқайсымызда өз атымыздағы дүние қалады. Менде тек бір көлік бар, ол да апатқа түскен», – деді Гүлайым.
Айта кетейік, деректерге сәйкес, Шавкат Рахмонов 2024 жылдың желтоқсанында UFC 310 турниріндегі жекпе-жегі үшін 350 мың доллар кепіл гонорар алған. Жеңісі үшін қосымша 100 мың доллар сыйақы берілген. Жалпы табысы бонус пен төлемдерді есептегенде 1 миллион доллардан асады деген мәлімет бар.