RUS
SMARTNEWS.KZ басылымының хабарлауынша, Алматы тұрғыны TikTok-та жарнамаланған «қауіпсіз» өнімнің құрбанына айналды. Жарнамасы жер жарған тауар ақырында ауыр аллергиялық реакция тудырып, ер адамды ауруханаға түсірді.
Оқиға әлеуметтік желідегі агрессивті маркетингтің тағы бір қауіпті қырын ашып берді. Сатушы өнімді «табиғи, тексерілген, зиянсыз» деп сендіріп, нәтиже болмаса ақшаны қайтаруға уәде берген. Осы сөзге сенген алматылық тапсырыс рәсімдейді.
Алайда препаратты қолданғаннан кейін көп ұзамай оның жағдайы күрт нашарлаған. Денесін бөртпе басып, беті мен тамағы ісіп, тыныс алуы қиындаған. Жедел жәрдем шақырылып, ер адам кешкі уақытта ауруханаға жеткізілген.
Емделіп шыққан соң тұтынушы уәде етілген ақшасын қайтармақ болған. Бірақ бұл жерде жағдай күрт өзгерген: сатушы түрлі сылтаулар айтып, қосымша сараптама мен анықтамалар талап еткен. Мұндай тексерулер отбасы үшін тым қымбатқа түскен.
Әділдікке өз күшімен жете алмаған азамат Жетісу облысының сауда және тұтынушылардың құқықтарын қорғау департаментіне жүгінген. Ведомство мамандары іске жедел араласып, құқықтық талдау жүргізген, кәсіпкерге заң талаптарын түсіндірген.
Нәтижесінде сатушы өз ұстанымын өзгертіп, тұтынушы талабын мойындады. Даулы мәселе шешіліп, алматылыққа толық көлемде — 90 мың теңге қайтарылды.
Мамандар мұндай жағдайлар әлеуметтік желілердегі жалған жарнама мен тексерілмеген өнімдердің қаупін тағы бір мәрте дәлелдейтінін айтады. Денсаулыққа қатысты тауарларды сатып аларда ресми дереккөздер мен сертификаттарға ғана сену қажет.