Павлодарда әскери қызметші өзін атып тастады
Келісімшарт бойынша қызмет еткен әскери қызметші өз қаруынан оқ атып, оқиға орнында қаза тапқан.
SMARTNEWS.KZ басылымының хабарлауынша, Павлодар қаласында 6679 әскери бөлімінде қайғылы жағдай тіркелді. Келісімшарт бойынша қызмет еткен әскери қызметшілердің бірі өзіне бекітілген қарудан оқ атып, оқиға орнында көз жұмған.
Алдын ала деректерге сәйкес, оқиға кезінде тағы бір келісімшарт әскери қызметшісі жарақат алған. Қазір бұл факті бойынша қылмыстық іс қозғалып, сотқа дейінгі тергеу жүріп жатыр. Құзырлы органдар оқиғаның барлық мән-жайын анықтауда.
Ішкі істер министрлігінің мәліметінше, жарақат алған әскери қызметшіге медициналық көмек көрсетіліп жатыр. Тергеу барысы ІІМ Әскери тергеу департаментінің бақылауында.
Өңірлік денсаулық сақтау басқармасы таратқан ақпаратқа сәйкес, 2001 жылы туған науқас Павлодар қалалық №1 ауруханасының жансақтау бөлімінде жатыр. Оның жағдайы ауыр, бірақ тұрақты деп бағаланған. Дәрігерлер қажетті ем-шаралардың барлығын жүргізіп жатыр.
Материал авторы
