RUS
SMARTNEWS.KZ басылымының хабарлауынша, Ресейдің Орынбор облысында Қазақстан шекарасы маңында полицейлерге оқ атқан күдікті ұсталды. Тергеу мәліметінше, күдікті — қатардағы әскери қызметкер Сергей Басалаев. Сот оны қамауға алу туралы санкция берді.
Оқиға 16 сәуір күні Ақкермановка елді мекенінде болған. Федералдық іздеуде жүрген ер адамды ұстауға келген полиция қызметкерлеріне ол қарумен қарсылық көрсетіп, оқ жаудырған. Соның салдарынан бір полицей қаза тапты, тағы үшеуі түрлі жарақат алды. Қаза болған — аға лейтенант Никита Гнусин, ол дәл сол күні 28 жасқа толған.
Қанды оқиғадан кейін өңірде ауқымды іздестіру операциясы басталды. Күдіктінің көлігі Белошапка ауылы маңынан табылып, өзі 18 сәуір күні сол аумақта тас жолға шыққан сәтінде қолға түсті.
Тергеу барысында оған бірнеше ауыр бап бойынша айып тағылды. Атап айтқанда, мобилизация кезінде әскери бөлімді өз бетінше тастап кету, құқық қорғау органдары қызметкерлерінің өміріне қол сұғу, адам өлтіру және адам өлтіруге оқталу деректері бойынша қылмыстық істер қозғалған.
Ресейлік ақпарат көздері күдіктінің алғашқы жауаптарын да жариялады. Оның айтуынша, ол бастапқыда холосты автомат сатып алып, оны өз бетінше қайта жасап, атыс қаруына айналдырған. Ал қару қолдануына «күш құрылымдары үйіне басып кірді» деген уәж айтқан.
Жараланған екі полицейдің жағдайы жақсарып, қанағаттанарлық деңгейге жақындағаны хабарланды. Үшінші зардап шеккен қызметкердің жағдайы әлі де ауыр, бірақ тұрақты.
Бұған дейін күдіктінің Қазақстанда туғаны белгілі болған. Ол бұрынғы ОҚО облысының Түлкібас ауданынан шыққан.