RUS
SMARTNEWS.KZ басылымының хабарлауынша, 20 сәуірге арналған ауа райы болжамы елдің жартысын алаңдатты. Қазгидромет 14 облысқа және Алматының таулы аймақтарына дауылды ескерту жариялады.
Синоптиктердің мәліметінше, елдің әр өңірінде тұман, қатты жел, найзағай, шаңды дауыл және түнгі үсік күтіледі. Әсіресе таулы аймақтар мен солтүстік өңірлерде ауа райы құбылмалы болмақ.
Алматы облысының таулы бөлігінде тұман түсіп, желдің екпіні 15-20 м/с-қа дейін күшейеді. Түнде кей жерлерде үсік жүреді. Алматы қаласының Медеу мен Бостандық аудандарында да таңертең тұман мен қатты жел болжанып отыр.
Ұлытау, Қарағанды және Абай облыстарында түнгі және таңғы уақытта тұман басады. Ақтөбе облысында күндіз жаңбыр мен найзағай күтіледі, жел күшейеді.
Атырау облысында да ауа райы күрт құбылады: жаңбыр, найзағай, тұман және екпінді жел қатар жүреді. Қызылорда облысында шаңды дауыл тұрып, желдің жылдамдығы 20 м/с-қа дейін жетуі мүмкін.
Жетісу мен Жамбыл облыстарында өрт қаупі жоғары деңгейде сақталып отыр. Түркістан облысында түнде үсік жүруі ықтимал.
Солтүстік Қазақстан, Шығыс Қазақстан және Маңғыстау облыстарында тұман, жел және жауын-шашын қатар күтіледі. Маңғыстауда кей жерлерде шаңды дауыл соғады.
Батыс Қазақстан облысында да күн күркіреп, жел күшейеді.