RUS
SMARTNEWS.KZ басылымының хабарлауынша, Маңғыстау облысында ауа райының күрт нашарлауынан ауыл шаруашылығы малдарының жаппай қырылуы тіркелді. 14–15 сәуір күндері Маңғыстау ауданында ондаған жылқының өлексесі табылып, жағдайға арнайы комиссия араласқан.
Әкімдік мәліметінше, шығын Сайөтес ауылы мен 7-разъезд аралығындағы теміржол маңында анықталған. Алдын ала болжам бойынша, малдың қырылуына күшті жел мен нөсер жауын себеп болған.
Шенеуніктердің айтуынша, табындар бағытынан жаңылып, жетуі қиын аймақтарға кетіп қалған. Соның салдарынан олар су басқан, батпақты жерлерде қырылған. Кейбір жылқылар елді мекендерден 60–80 шақырым қашықтықта табылған.
Нақты шығын көлемі әлі анықталып жатыр. Себебі табиғи жағдайдың қиындығына байланысты мал иелері толық есеп жүргізе алмай отыр.
Оқиғаға байланысты жедел шаралар қолға алынған. Бейнеу ауданынан Ақшымырау ауылына арнайы «Трэкол» жол талғамайтын техникасы жіберілді. Сонымен қатар жоғалған малды іздеу үшін дрондар арқылы әуеден бақылау жүргізілуде.
Өңірде жедел штаб құрылып, мұнай-газ компанияларына қосымша техникамен көмектесу тапсырылған. Облыстық ауыл шаруашылығы басқармасының басшысы оқиға орнында жүріп, тұрғындармен кездесіп, жұмыстарды үйлестіріп жатыр.
Табиғи апат инфрақұрылымға да зиян келтірген. Сайөтес ауылында бірнеше ғимараттың шатырлары зақымданған. Ал Ақшымырауда нөсер жауын салдарынан су басу деректері тіркелді.
Қазір өңірде барлық күш жұмылдырылған. Төтенше жағдай қызметтері, ірі кәсіпорындар мен жергілікті билік су сору және қалпына келтіру жұмыстарын күшейтілген режимде жүргізіп жатыр.
Әкімдік жағдай бақылауда екенін және тұрғындарға көмек көрсету бойынша қажетті шаралар қабылданып жатқанын мәлімдеді.