RUS
SMARTNEWS.KZ басылымының хабарлауынша, Астанада медицина қызметкеріне қол көтерген азамат сотталды. Қалалық қылмыстық істер жөніндегі ауданаралық сот ер адамды Қылмыстық кодекстің 380-3-бабы 3-бөлігі бойынша кінәлі деп танып, 1 жыл 6 айға бас бостандығынан айырды.
Оқиға 2026 жылдың 13 наурызында болған. Мас күйде жүрген күдікті сауда үйінің автотұрағында жедел жәрдем бригадасының жұмысына көңілі толмай, фельдшерге күш қолданған. Сот материалдарына сәйкес, ол медицина қызметкеріне дене ауырсынуын келтіргенімен, денсаулыққа зиян келтірмеген. Дегенмен бұл әрекет медицина қызметкерлерінің қауіпсіз еңбек ету құқығын және жеке басының қол сұғылмауын өрескел бұзған.
Айыптаушы тарап соттан 1 жыл 6 ай түрме жазасын сұраған. Сотталушы кінәсін мойындап, бас бостандығынан айырмауды өтінгенімен, жәбірленуші керісінше қатаң жаза тағайындауды талап еткен.
Сот ер адамның бұрын сотталмағанын ескергенімен, оның қоғамдық орында ішімдік ішу, тыныштықты бұзу сияқты әкімшілік құқықбұзушылықтар үшін бірнеше рет жауапқа тартылғанын назарға алды.
Іс жеделдетілген тәртіппен қаралғандықтан, заң талаптарына сәйкес жаза ең жоғарғы мерзімнің жартысынан аспады. Нәтижесінде сот айыпталушыны 1 жыл 6 айға бас бостандығынан айырып, жазаны қылмыстық-атқару жүйесінің ең төменгі қауіпсіздік мекемесінде өтеуді белгіледі.
Үкім әзірге заңды күшіне енген жоқ.