RUS
SMARTNEWS.KZ басылымының хабарлауынша, әлемдегі ең ірі айсбергтердің бірі – А23а толық ыдырап, бірнеше ұсақ бөлікке бөлінді. Соның нәтижесінде мұз массиві бұрынғы көлемінің 99 пайызын жоғалтып, шамамен 100 есе кішірейген.
Бұл туралы Арктикалық және Антарктикалық ғылыми-зерттеу институты мамандары 2026 жылдың 21 сәуірінде хабарлады. Ғалымдардың айтуынша, 40 жыл бойы бақылауда болған алып айсберг өз тарихының соңына таяп қалған.
Институт өкілі Полина Солощуктың мәліметінше, қаңтар айында оның ауданы шамамен 1300 шаршы шақырым болса, қазіргі таңда 50 шаршы шақырымнан да аз қалған. Айсберг ашық мұхитта еркін қалқып жүріп, соңғы айларда көз алдымызда бөлшектеніп барады. Соңғы үш айда ол шамамен 1000 шақырым қашықтықты жүріп өтіп, Оңтүстік және Атлант мұхиттарының шекарасын кесіп өткен.
А23а айсбергі алғаш рет 1986 жылы Фильхнер мұзды шельфі шетінен ажырап шыққан. Сол кездегі ауданы 4170 шаршы шақырым болған, бұл Санкт-Петербург қаласының аумағынан екі есе үлкен.
30 жылдан астам уақыт ол Уэдделл теңізі орталық бөлігінде тұрып қалған. Кейін Антарктида жағалауын бойлай қозғала бастайды. 2023 жылдың соңына қарай ашық суға шыққан айсберг солтүстік бағытқа қарай дрейф жасап, 2025 жылдың басында Оңтүстік Георгия аралына жақындаған. Арал маңында біраз уақыт қайтадан таяз жерге тіреліп, кейін қайта қозғалып, аралды шығыс жағынан айналып өткен.
Ғалымдар мұндай көлемдегі мұз массивінің жылдам бөлшектенуін климаттық және мұхиттық жағдайлардың өзгерісімен байланыстырады.