RUS
SMARTNEWS.KZ басылымының хабарлауынша, Атырау облысында аудан әкімдігі тозығы жеткен спорт кешенін 389 млн теңгеге сатып алмақ болған. Бюджет қаржысының орынсыз жұмсалуына прокуратура тосқауыл қойды.
Облыстық прокуратураның мәліметінше, Жылыой ауданында бюджет қаражатын негізсіз жоспарлау дерегі анықталған. 2025 жылғы 17 желтоқсанда аудандық бюджет комиссиясы спорт кешенін сатып алуға 389 млн теңге бөлуді мақұлдаған.
Алайда тексеріс барысында сатып алынуы тиіс нысанның әбден тозғаны белгілі болған. Бұл оны алғаннан кейін қосымша жөндеу шығындарын талап ететінін көрсетеді. Яғни, жоба іске асса, бюджет қаржысы екі рет жұмсалар еді.
Қадағалау органы бұл бастама тиімділік пен ұтымды жоспарлау қағидаттарына қайшы екенін атап өтті. Нәтижесінде прокурорлық акт енгізіліп, қаражат бөлу туралы шешімнің күші жойылды.
Осылайша, 389 млн теңге көлеміндегі негізсіз шығынның алдын алу мүмкін болды.